【澳洲咁大去邊「島」玩？】
講起澳洲嘅島，相信唔少人第一個就會諗起塔斯曼尼亞！之但係澳洲咁大，擁有成5萬公里嘅海岸線，又點會只係得一個島嶼？成個澳洲大大細細嘅島有成8千幾個咁多啊！喺呢啲唔同面積同氣候嘅海島上面，你可以睇到崎嶇嘅海岸、色彩繽紛嘅珊瑚礁、沉寂嘅火山等等多種我哋唔係成日見得到嘅地貌！不過咁多個島又真係好難一次過去哂嘅！唔知以下呢四個島又啱唔啱你心水呢？
1. Lord Howe Island Tourism
Lord Howe Island 係畀聯合國教科文組織列咗為「世界遺產名錄」嘅天堂之島！呢度亦都係世界上最南嘅珊瑚礁島嚟㗎！但係全島只有11公里長，其實唔算大㗎咋，所以呢度每日都有遊客人數管制㗎！喺呢個島你可以享受嘅係一個真正嘅大自然環境：既無任何架空電纜，亦無高樓大廈。喺呢個天堂之島上面，遊客可以喺度體驗下畀原始熱帶雨林同海灘海洋同時包圍住嘅感覺！浮潛、潛水呢啲活動緊係唔少得啦！喺湖中暢泳、划船、釣魚等你都唔可以喺島上錯過㗎！ 當你置身喺呢個天堂之島嘅時候，你問我壓力？咩嚟㗎？食得㗎？
圖片來源📷 : Lord Howe Island Tourism
2. Authentic Kangaroo Island
澳洲的第三大島就係袋鼠島－Kangaroo Island 啦～ 喺島上面就可以一次過滿足你三個願望：睇自然奇觀、同野生動物玩同試盡最好味嘅嘢食同美酒！但要留意嘅係，袋鼠島入面大部分都係仲未畀人類開發嘅一個真正野生動物保護區，所以呢度可以話係一個「無圍欄嘅動物園」！大家去到睇還睇，盡量唔好騷擾到安居喺袋鼠島嘅動物啊！
圖片來源📷 : Authentic Kangaroo Island
3. Rottnest Island, Western Australia
位於珀斯附近嘅 Rottnest Island 其實就好似一個遠離塵囂嘅世界咁～ 被分類為 A 級自然保護區嘅 Rottnest Island 保護區入面，既有稀有嘅植物，仲有豐富嘅海洋同野生生態！而踩單車就係環島遊嘅最佳方式，信我啦，行係行唔哂㗎！踩緊單車嘅同時記得留意你身邊有無短尾矮袋鼠（quokkas）經過啊，佢哋真係非常之可愛㗎～ 難得嚟到你又會唔會想試下高空跳傘呢？俯瞰成個 Rottnest Island 之後再降落喺海灘上，真係一定會令你畢生難忘！講多個冷知識畀你知！Rottnest Island 周圍嘅水域其實有好多沉船 − 呢啲船其實係早期探索西澳西南部海岸時遺留落嚟嘅船隻，而家就已經變咗最正嘅潛水同浮潛地點喇！
圖片來源📷 : Rottnest Island, Western Australia
4. Bruny Island
由 Hobart 揸車向南，30分鐘左右就到咗寧靜嘅海邊小鎮叫做 Kettering，嗰度有客用渡輪定時過去 Bruny Island 㗎！呢個島實際上係兩個島嚟嘅，由一段叫做 The Neck 嘅狹窄地峽連接住兩邊～ 北面地勢比較平緩，南面嘅就更加具有一個山區地形：有陡峭嘅海岸啦、環繞住森林同荒野，呢個感覺真係好正！。每年嘅5月至7月同埋9月至12月期間，呢度就會成為座頭鯨同南露脊鯨完美嘅休憩地，想近距離見到佢哋呢，就要睇下你好唔好彩喇！
圖片來源📷 : Bruny Island
Search